నారదుడిలా అన్నాడు. రాజా! కుబేరసభ నూరుయోజనాల పొడవు, డెబ్బది యోజనాల వెడల్పు కలది. తెల్లని కాంతితో ప్రకాశించేది. (1)

రాజా! విశ్రవసుని కొడుకు కుబేరుడు దీనిని తపస్సు చేసి సాధించాడు. శ్వేతకాంతితో అది వెన్నెలలను తిరస్కరిస్తూ కైలాసశిఖరం వలె భాసిస్తుంది. (2)

గుహ్యకులు దీనిని మోస్తుంటారు. ఆ సమయంలో అది ఆకాశాన్ని అంటినట్టు ప్రకాశిస్తుంది. దివ్యమైన, స్వర్ణమయమయిన ప్రాసాదాలతో అది విరాజిల్లుతుంది. (3)

మహారత్నాలతో, చిత్రవర్ణాలతో, దివ్యగంధాలతో తెల్లని మేఘాల వంటి ఆకృతితో మనోహరమై అది గగనసీమలో ఈదులాడుతున్నట్లు కనిపిస్తుంది. (4)

ఆ కుబేరసభ బంగారువన్నెలతో అలంకరింపబడిన గోడలతో మెరుపుల వలె ప్రకాశిస్తూ దివ్యంగా ఉంటుంది. (4 1/2)

ఆ సభలో కుబేరుడు విచిత్రాభరణాలు, విచిత్రవస్త్రాలు ధరించి, ప్రజ్వలిమ్చే కుండలాలు అలంకరించుకొని దివ్యాసనాలు, దివ్యపాదపీఠాలు కలిగి సూర్యతేజస్సుతో ప్రకాశిస్తున్న దివ్యసింహాసనంపై కూర్చొని ఉంటాడు. వేలకొలది స్త్రీలు ఆయనను చుట్టి ఉంటారు. (5,6)

ఉదారమందార వృక్షాలను కదిలిస్తూ, సౌగంధికావన, అలకా, పుష్కరిణీ, నందనవనాల సౌరభాన్ని మోస్తూ హృదయానందకరంగా వీస్తూ చల్లనిగాలి ఆ కుబేరుని సేవిస్తుంది. (7,8)

రాజా! అక్కడ గంధర్వులతో, అప్సరోగణాలతో సహా దేవతలు సభాసదులై దివ్యతానాలతో గానం చేస్తుంటారు. (9)

మిశ్రకేశి, రంభ, చిత్రసేన, శుచిస్మిత, చారునేత్ర, ఘృతాచి, మేనక, పుంజికస్థల, విశ్వాసి, సహజన్య, ప్రమ్లోచ, ఊర్వశి, ఇర, వర్గ, సౌరభేయి, సమీచి, బుద్బుద, లత మొదలయిన వేలకొలది నృత్యగీతవిశారదులయిన గంధర్వాప్సరోగణాలు కుబేరుని సేవిస్తుంటారు. (10-12)

గంధర్వాప్సరోగణాల దివ్యవాద్య, నృత్య, గీతాలతో నిండి నిరంతరమూ ప్రతిధ్వనించే ఆ కుబేరసభ మనోరంజకంగా నిండుగా ప్రకాశిస్తుంది. (13)

భారతా! కిన్నరులు, నరులు, గంధర్వులు, మనిభద్రుడు, ధనదుడు, శ్వేతభద్రుడు, కశేరకుడు, గండకండువు, ప్రద్యోతుడు, కుస్తుంబురుడు (పిశాచ), గజకర్ణుడు, విశాలకుడు, వరాహకర్ణుడు, తామ్రోష్ఠుడు, ఫలకక్షుడు, ఫలోదకుడు, హంసచూడుడు, శిఖావర్తుడు, హేమనేత్రుడు, విభీషణుడు, పుష్పాననుడు, పింగళకుడు, శోణితోదుడు, ప్రవాలకుడు, వృక్షవాసి, అనికేతుడు, చీరవాససుడు, మొదలుగా గల యక్షులు లక్షల కొలది ఆ సభలో నిలిచి కుబేరుని సేవిస్తారు. (14-18)

పూజనీయ అయిన లక్ష్మి, నలకూబరుడు, నేను నా వంటివారు మరెందరో ఆ కుబేరసభలో ఎక్కువగా ఉంటారు. (19)

బ్రహ్మర్షులు, దేవర్షులు, ఇతర ఋషిగణాలు ఆ సభలో ఉంటారు. అంతే గాక ఎందరో పిశాచులు, మహాబలులయిన గంధర్వులు లోకపాలకుడైన కుబేరుని సేవిస్తుంటారు. (20 1/2)

రాజశ్రేష్ఠా! లక్షల కొలది భూతసమూహాలు చుట్టుముట్టగా ఉగ్రధనుర్ధారి, మహాబలి, పశుపతి, శూలధారి, భగదేవతనేత్రాలను పోగొట్టినవాడు, త్రిలోచనుడు అయిన శివుడు, అలసట లేని పార్వతి - ఈ ఇద్దరూ భూతప్రేతాదులతో కలిసి తమ మిత్రుడైన కుబేరుని ఎప్పుడూ సేవిస్తుంటారు. ఆ భూతప్రేతాలు వామనులు, వికటులు, కుబ్జులు, ఎర్రటి కనులు గలవారు, గొప్ప కోలాహలం చేసేవారు, మేదోమాంసాలను తినేవారు, వివిధ శస్త్రాస్త్రాలను ధరించినవారు, గాలివలె తీవ్రవేగం కలవారు. (21-24)

వీరే కాక వివిధవస్త్రాభరణాలను అలంకరించుకొని ప్రసన్నచిత్తులయిన వందలకొలది గంధర్వపతులు-విశ్వావసువు, హహుడు, హుహుడు, తుంబురుడు, పర్వతుడు, శైలూషుడు, చిత్రసేనుడు, చిత్రరథుడు మొదలగువారు - ధనాధిపతి అయిన కుబేరుని సేవిస్తుంటారు. (25,26)

విద్యాధరచక్రవర్తి అయిన చక్రధర్ముడు తన తమ్ములతో సహా ఆ సభలో ధనాధిపతి అయిన కుబేరుని సేవిస్తాడు. (27,28)

భగదత్తుడు మొదలగు రాజులు ఆ సభలో ఉంటారు. కింపురుషరాజయిన ద్రుముడు కుబేరుని ఉపాసిస్తుంటాడు. (29)

మహేంద్రుడు, గంధమాదనుడు, ధర్మనిష్ఠుడు, రాక్షసాధిపతి అయిన విభీషణుడు, యక్ష, గంధర్వ, నిశాచరులతో కలిసి తమ సోదరుడయిన కుబేరుని సేవిస్తుంటారు. (30 1/2)

హిమవంతం, పారియాత్రం, వింధ్యం, కైలాసం, మందరం, మలయం, దర్దురం, మహేంద్రం, గంధమాదనం, ఇంద్రకీలం, సునాభం, మేరువు మొదలుగా గల ఇతర పర్వతాలు మహనీయుడు, ధనాధిపతి అయిన కుబేర ప్రభువును సేవిస్తుంటాయి. (31-33)

పూజ్యుడయిన నందీశ్వరుడు, మహాకాలుడు, శంకుకర్ణుడు మొదలగు దివ్యసభ్యులు, కాష్ఠుడు, కుటీముఖుడు, దంతి, తపస్వి అయిన విజయుడు, గర్జనశీలుడయిన శ్వేతనంది ఆ సభలో ఉంటారు. (34,35)

వివిధరాక్షసులు, పిశాచాలు కుబేరుని సేవిస్తుంటారు. దేవదేవేశుడు, త్రిభువనభావనుడు, బహురూపధారి, కళ్యాణస్వరూపుడు, ఉమాపతి అయిన మహేశ్వరుడు సహచరులతో కలిసి ఆ సభలో ప్రవేశిచినప్పుడు పులస్త్యనందనుడు, ధనాధిపతి అయిన కుబేరుడు తలవంచి ప్రణమిల్లి ఆయన అనుమతితో దగ్గర కూర్చుంటాడు. కుబేరుని మిత్రుడయిన శివుడు అప్పుడప్పుడు ఆ సభలో కనిపిస్తాడు. (36-38)

శ్రేష్టనిధులయిన శంఖపద్మాలు రూపాలను ధరించి ఇతర నిధులతో కలిసి ధనేశ్వరుడయిన కుబేరుని సేవిస్తాయి. (39)

గగనసంచారిణి అయిన ఆ రమణీయ కుబేరసభను నేను చూచాను. రాజా! ఇక బ్రహ్మసభను గూర్చి చెపుతాను. విను. (40)

ఇది శ్రీమహాభారతమున సభాపర్వమున లోకపాల సభాఖ్యానపర్వమను ఉపపర్వమున ధనదసభావర్ణనమను పదవ అధ్యాయము. (10)