ఉగ్రశ్రవుడు చెపుతున్నాడు. బ్రాహ్మణోత్తమా! ఏలాపత్రుని ఆ మాటలను విని సర్పాలన్నీ సంతోషించాయి. చాలా బాగున్నదని ప్రశంసించాయి. ఆనందాన్ని పొందాయి. ఆనాటి నుండి వాసుకి తన సోదరి జరత్కారువును చాలా జాగ్రత్తగా చూసుకొంటూ, ఎంతో ఆనందంగా ఉన్నాడు. (1,2)

కొంతకాలం గడచింది. దేవతలు, రాక్షసులు అమృతం కోసం సముద్రాన్ని మథించారు. అపుడు మందరపర్వతాన్ని కవ్వంగా చేసుకొని, బలాఢ్యుడయిన వాసుకిని త్రాడుగా ఉపయోగించుకొన్నారు. అమృతం కోసం తలపెట్టిన మంథనకార్యం పూర్తి అయ్యాక దేవతలు వాసుకిని వెంటబెట్టుకొని బ్రహ్మదగ్గఱకు వెళ్లి ఆయనతో ఈ విధంగా అన్నారు. "భగవాన్! ఈ వాసుకి తల్లి ఇచ్చిన శాపం వల్ల మిక్కిలి భయపడుతున్నాడు. చాలా పరితపిస్తున్నాడు. (3-5)

ఈ వాసుకి హృదయంలో ఉన్న ఈ బాధని మీరే తొలగించాలి. ఇతడు సోదరులకు, బంధువులకు హితం కోరేవాడు. మాతృశాపానికి చాలా వేదన చెందుతున్నాడు. (6)

ఈ నాగరాజు మన అందరికీ సహాయపడుతూ మనకు మేలుచేసేవాడు. మీరు అనుగ్రహించి ఈతని మనస్తాపాన్ని పోగొట్టవలసినదిగా కోరుతున్నాం." (7)

బ్రహ్మ చెప్తున్నాడు. దేవతలారా! ఏలాపత్రుడు వాసుకి సమక్షంలో పూర్వం ఏమిచెప్పాడో అది సత్యం. నా ప్రేరణ వల్లనే ఏలాపత్రుడు ఆ మాటలు చెప్పాడు. కాబట్టి ఏలాపత్రుడు వాసుకి మొదలగు వారితో కద్రూశాప ప్రతీకారం గురించి పూర్వం చెప్పినట్లే జరుగుతుంది. (8)

ఈ నాగరాజు సమయం వచ్చినపుడు తానే స్వయంగా దానికి అనుగుణంగా ప్రవర్తిస్తాడు. పాపాత్ములు మాత్రమే జనమేజయుని సర్పయాగంలో మరణిస్తారు. ధర్మాత్ములంతా సురక్షితంగానే ఉంటారు. (9)

జరత్కారుడు అనే బ్రాహ్మణుడు జన్మించి, అతడు ఉగ్రమైన తపస్సు చేస్తున్నాడు. వాసుకి సమయానుకూలంగా తన సోదరి జరత్కారువును అతనికి సమర్పించాలి. (10)

దేవతలారా! ఏలాపత్రుడు చెప్పిన మాటలన్నీ సర్పాలకు హితకరాలే. అతని మాటప్రకారం జరిగి తీరుతుంది. దానికి వ్యతిరేకంగా ఏమీ జరగదు. (11)

ఉగ్రశ్రవుడు చెపుతున్నాడు. బ్రహ్మదేవుని ఆ మాటల్ని వాసుకి విని ఆనందంగా తన సోదరులందరికీ చెప్పాడు. సోదరి జరత్కారువును జరత్కారుమహర్షికి ఇచ్చి వివాహం చేయడానికి ప్రయత్నం చేయాలి. ఆ జరత్కారుని కనుగొనటానికి సర్పాలను ఆదేశించాడు. (12,13)

జరత్కారుమహర్షి ఎప్పుడు వివాహం చేసుకొనదలచాడో అపుడు ఆ విషయాన్ని వెంటనే నాకు తెలియజేయవలసినదనీ, అపుడు అందరికీ మేలు కలుగుతుందనీ వాసుకి తన సోదరులకు చెప్పాడు. (14)

ఇది శ్రీమహాభారతమున ఆదిపర్వమున ఆస్తీకపర్వమను ఉపపర్వమున జరత్కారుని కొరకు అన్వేషణము అను ముప్పది తొమ్మిదవ అధ్యాయము. (39)