విదురుడిలా అన్నాడు - జూదం కలహాలకు మూలం. కడకు అభిప్రాయభేదాలు వచ్చి చాలా దారుణంగా పరిణమిస్తుంది. ధృతరాష్ట్రకుమారుడయిన దుర్యోధనుడు ఆ జూదాన్ని ఆశ్రయించి భీకరశత్రుత్వాన్ని సృష్టిస్తున్నాడు. (1)

దుర్యోధనును అపరాధం వలన ప్రతీప, శంతను, భీమసేన, బాహ్లీక వంశస్థులు అన్నివిధాలా కష్టాలు పడబోతున్నారు. (2)

మదించిన ఆబోతు తన కొమ్మును తానే విరుచుకొన్నట్లు మదించిన ఈ దుర్యోధనుడు రాజ్యం నుండి సంక్షేమాన్ని దూరం చేస్తున్నాడు. (3)

రాజా! వీరుడా, పండితుడా అయిన మనిషి తన ఆలోచనలను కాదని పరులచిత్తాన్ని అనుసరించి ప్రవర్తిస్తే సముద్రంలో మూర్ఖనవికుడు నడిపే పడవలో ఎక్కిన మనిషి వలె భయంకరకష్టాలలో మునిగిపోతాడు. (4)

దుర్యోధనుడు యుధిష్ఠిరునితో పందెం పెట్టి జూదమాడుతున్నాడు. ఆ దుర్యోధనుడు గెలిచినట్టే భావించి నీవు ముచ్చటపడుతున్నావు. హద్దులు మీరిన వినోదంతో ఈ జూదం యుద్ధంగా మారబోతుంది. దీనివల్ల ఎందరో మనుష్యులు నశించిపోతారు. (5)

ఈ జూదం అధఃపతనానికి దారితీస్తుంది. కాని (శకుని) దీనిని గొప్పగా భావించి ఏర్పాటు చేయించావు. మీరు రహస్యంగా మంత్రాంగం నెరిసి దీనిని స్థిరపరిచారు. అయితే యుధిష్ఠిరునితోడి ఈ జూదం నీ అభిప్రాయానికి విరుద్ధంగా కలహరూపంగా పరిణమిస్తోంది. (6)

ప్రతీపశంతను వంశస్థులారా! కౌరవసభలో నేనాడిన మాటలను వినండి. ఇది విద్వాంసులు కూడా సమ్మతించేది. మీరంతా ఈ మూర్ఖదుర్యోధనును అనుసరిస్తూ వైరంతో మండిపడే అగ్నిలోనికి దూకకండి. (7)

జూదం మత్తులో మైమరచి ఉన్న అజాతశత్రువయిన యుధిష్ఠిరుడు తనకోపాన్ని నియంత్రించుకొనకపోతే, భీముడు, అర్జునుడు, నకుల సహదేవులు కూడా కోపంతో చెలరేగితే జరగబోయే యుద్ధంలో విపత్సముద్రంలో మునిగిపోయిన మీకు ఆశ్రయమిచ్చేవాడెవడు? (8)

మహారాజా! జూదమాడకపోయినా నీవు కోరుకొన్నంత ధనాన్ని పొందగలవు. బహుసంపన్నులైన పాండవులను జూదంలో ఓడించినంత మాత్రాన నీకు ఒరిగేదేముంది? పాండవులు ధనస్వరూపులు. వారిని సొంతం చేసికో. (9)

శకుని ద్యూతవిద్య ఏమిటో మనకు తెలుసు. ఆ పర్వతరాజుకు కపటద్యూతమే తెలుసు. శకునిని వచ్చిన చోటికే పంపివేయి. భారతా! కౌరవపాండవుల మధ్య యుద్ధాన్ని కల్పించకు. (10)

ఇది శ్రీమహాభారతమున సభాపర్వమున ద్యూతపర్వమను ఉపపర్వమున విదురవాక్యమను అరువది మూడవ అధ్యాయము. (63)