జనమేజయుడిలా అన్నాడు.

మునివరా! వీరులైన పాండవులను అరణ్యానికి పంపించి, ధృతరాష్ట్రుడీవిధంగా దుఃఖించడం వ్యర్థం. (1)

మహారథులైన పాండుపుత్రులకు కోపం కలిగించిన, మంద బుద్ధి ఐన తనపుత్రుడు దుర్యోధనుని ధృతరాష్ట్రుడు ఏవిధంగా ఉపేక్షించగలడు? (2)

విప్రవరా! అడవిలో పాండవులకు ఆహారంగా ఏం లభించింది? వారు అడవిలోని ఫలమూలాలు తిన్నారా! లేక భూమిని దున్ని ఆహారం పండించుకొని తిన్నారా! నాకు వివరంగా చెప్పు. (3)

వైశంపాయనుడిలా అన్నాడు - పురుషశ్రేష్ఠులైన పాండవులు వన్యాలైన ఫలమూలాలను, స్వచ్ఛమైన బాణాలతో పడగొట్టిన మృగాలను ముందుగా బ్రాహ్మణులకు నివేదిమ్చి తింటున్నారు. (4)

రాజా! వనంలో నివసిస్తున్న మహాధన్వులూ, శూరులైన పాండవులను అక్కడి బ్రాహ్మణులంతా అనుసరించారు. (5)

అక్కడ యుధిష్ఠిరుడు మహాత్ములు, స్నాతకులు, మోక్షవేత్తలూ అయిన పదివేలమంది బ్రాహ్మణులను రక్షించి, పొషిస్తున్నాడు. (6)

రురుమృగాలను, కృష్ణమృగాలను, పవిత్రాలైన మృగాలను బాణాలతో చంపి వాటిచర్మాలను పాండవులు బ్రాహ్మణులకు ఆసనాదులకై ఇస్తున్నారు. (7)

అక్కడున్న బ్రాహ్మణులలో ఒక్కడికి కూడ శరీరవర్ణం మారలేదు. ఒక్కడు కూడా వ్యాధిగ్రస్తుడు కాలేదు. ఒక్కడూ కృశించలేదు. దుర్బలుడు కాలేదు. ఒక్కడూ దీనుడు లేడు. భయపడినవాడెవడూ లేడు. (8)

కురుశ్రేష్ఠుడు, యుధిష్ఠిరుడు అయినా ధర్మరాజు తనసోదరులను ప్రియపుత్రులుగా, జ్ఞాతులను సోదరులుగా పోషిస్తున్నాడు. (9)

యశస్విని అయిన ద్రౌపది ముందుగా భర్తలకు, సమస్త బ్రాహ్మణులకు తల్లివలె భోజనం పెట్టి, తర్వాత మిగిలినది ఆమె తింటుంది. (10)

యుధిష్ఠిరుడు తూర్పున, భీమసేనుడు దక్షిణాన, నకులసహదేవులు పశ్చిమోత్తరాలయందు తక్కిన ధనుర్ధారులతో కూడి నిత్యమూ హింసకజంతువులను సంహరిస్తున్నారు. (11)

ఈవిధంగా కామ్యకవనంలో అర్జునుడు లేకుండా పాండవులు అతని కొరకు ఉత్కంఠితులై ఐదు సంవత్సరాలు స్వాధ్యాయ, జప, హోమాలతో కాలం గడిపారు. (12)

శ్రీమహాభారతమున వనపర్వమున ఇంద్రలోకాభిగమపర్వమను ఉపపర్వమున పార్థాహారకథనమను ఏబదియవ అధ్యాయము. (50)