జనమేజయుడు అడుగుతున్నాడు - ద్రౌపది యొక్క అపహరణ వలన ఎన్నో కష్టాలకు గురైన, సింహసమాన పరాక్రములయిన ఆ పాండవులు తరువాత ఏం చేశారు? (1)

వైశంపాయనుడు చెపుతున్నాడు - "జనమేజయా! జయద్రథుని జయించి కృష్ణను విడిపించి తీసికొని వచ్చాక ధర్మరాజు మునులతో పాటుగా ఆసీనుడయ్యాడు. (2)

మహర్షులందరూ కూడా పాండవులకు వచ్చిన కష్టాలను విని సంతాపం ప్రకటిస్తూండగా, పాండునందనుడైన యుధిష్ఠిరుడు మార్కండేయ మహామునిని ఉద్ధేశించి ఇలా అన్నాడు. (3)

యుధిష్ఠిరుడు అడుగుతున్నాడు - "భగవాన్! మీరు భూత భవిష్యత్తులు తెలిసినవారు. దేవర్షులలో చాలా ప్రసిద్ధులు. నా మనసులోని సందేహాన్ని అడుగుతున్నాను తీర్చండి. (4)

ద్రుపదుని కూతురయిన ఈమె అగ్నికుండం నుండి అయోనిజయై జన్మించింది. సౌభాగ్యశాలిని. మహాత్ముడయిన పాండునికి కోడలు. (5)

భగవంతుడయిన కాలానికి, విధి నిర్మితమయిన దైవానికి ప్రాణుల యొక్క భవితవ్యానికి (జరుగబోయే ఘటనలకు) తిరుగులేదని అనుకుంటున్నాను. (6)

కాకుంటే ధర్మజ్ఞురాలు, ధర్మపరాయణురాలు అయిన మా ఈ భార్య పట్ల అటువంటి భావం (అపహరించాలనే భావం) ఎలా కలుగుతుంది? ఇది ఎలా ఉందంటే సత్ప్రవర్తన కలవానిపై అబద్ధపు దొంగతనం ఆరోపించినట్లు ఉంది. (7)

ఈమె ఎప్పుడూ కించిత్తు పాపమయినా చేయలేదు. నింద్యమైన పనులు కూడా చేయలేదు. బ్రాహ్మణుల పట్ల సేవా సత్కారాది మహా ధర్మాలనే ఈ ద్రౌపది ఆచరిస్తూ ఉంటుంది. (8)

అటువంటి ఆమెను మూఢుడైన జయద్రథుడు బలవంతంగా ఎత్తుకుపోయాడు. ఆ కారణంగానే ఆ పాపికి శిరోముండనం చేయబడింది. మేము అతనిని అనుచరులతో సహితంగా యుద్ధంలో ఓడించి, సింధు దేశపు సైన్యాన్ని సంహరించి ఈమెను తిరిగి తీసుకొనివచ్చాము. (9,10)

ఊహించని రీతిగా భార్యాపహరణం అనే కష్టం మాకు కలిగింది. కపట వర్తనులైన జ్ఞాతుల చేత ఈ వనవాసం కలిగింది.(11)

నావంటి నిర్భాగ్యుడైన పురుషుడు ఎవరైనా ఉన్నట్లు మీరు ఇంతకుముందు చూచిగాని వినిగాని ఉన్నారా? (12)

ఇది శ్రీమహాభారతమున వనపర్వమున రామోపాఖ్యానపర్వమను ఉపపర్వమున యుధిష్ఠిర ప్రశ్నమను రెండువందల డెబ్బదిమూడవ అధ్యాయము. (273)